പാപിയായ സ്ത്രീയും യേശുവിന്റെ കാരുണ്യവും • ഞാനും നിന്നെ വിധിക്കുന്നില്ല

യേശു ഒലിവുമലയിലേക്കു പോയി. പ്രഭാതത്തിൽ അവൻ വീണ്ടും ദൈവാലയത്തിലെത്തി. ജനമെല്ലാം അവന്റെ അടുക്കൽ വന്നു; അവൻ ഇരുന്ന് അവരെ പഠിപ്പിച്ചു. വ്യഭിചാരത്തിൽ പിടിക്കപ്പെട്ട ഒരു സ്ത്രീയെ നിയമജ്ഞരും ഫരിസേയരും അവന്റെ മുമ്പിൽ കൊണ്ടുവന്നു നിർത്തി. അവർ അവനോടു ചോദിച്ചു: ഗുരോ, ഈ സ്ത്രീ വ്യഭിചാരത്തിൽ ഏർപ്പെട്ടിരിക്കുമ്പോൾത്തന്നെ പിടിക്കപ്പെട്ടവളാണ്. ഇങ്ങനെയുള്ളവരെ കല്ലെറിയണമെന്നാണ് മോശ നിയമത്തിൽ കൽപിച്ചിരിക്കുന്നത്. നീ എന്തു പറയുന്നു? യേശു കുനിഞ്ഞ് വിരൽകൊണ്ട് നിലത്ത് എഴുതിക്കൊണ്ടിരുന്നു. അവർ ചോദ്യം ആവർത്തിച്ചപ്പോൾ അവൻ നിവർന്നുനിന്ന് അവരോടു പറഞ്ഞു: നിങ്ങളിൽ പാപമില്ലാത്തവൻ ആദ്യം ഇവളെ കല്ലെറിയട്ടെ! അവൻ വീണ്ടും കുനിഞ്ഞ് നിലത്ത് എഴുതിക്കൊണ്ടിരുന്നു. ഇതുകേട്ടപ്പോൾ മുതിർന്നവർ മുതൽ ഓരോരുത്തരായി സ്ഥലംവിട്ടു. ഒടുവിൽ യേശുവും ആ സ്ത്രീയും മാത്രം അവശേഷിച്ചു. യേശു നിവർന്നുനിന്ന് അവളോടു ചോദിച്ചു: സ്ത്രീയേ, അവർ എവിടെ? ആരും നിന്നെ വിധിച്ചില്ലയോ? അവൾ പറഞ്ഞു: ഇല്ല, കർത്താവേ. യേശു അരുളിച്ചെയ്തു: ഞാനും നിന്നെ വിധിക്കുന്നില്ല; പൊയ്ക്കൊള്ളുക, ഇനിമേൽ പാപം ചെയ്യരുത്.