സ്വർഗ്ഗസ്ഥനായ ഞങ്ങളുടെ പിതാവേ • കർത്തൃപ്രാർത്ഥന

യേശു തന്റെ ശിഷ്യന്മാരോട് അരുളിച്ചെയ്തു: പ്രാർത്ഥിക്കുമ്പോൾ നിങ്ങൾ വിജാതീയരെപ്പോലെ വ്യർത്ഥവചനങ്ങൾ ആവർത്തിക്കരുത്. കൂടുതൽ സംസാരിച്ചാൽ തങ്ങളുടെ പ്രാർത്ഥന കേൾക്കുമെന്ന് അവർ വിചാരിക്കുന്നു. നിങ്ങൾ അവരെപ്പോലെ ആകരുത്. കാരണം, നിങ്ങൾ ചോദിക്കുന്നതിനു മുമ്പുതന്നെ നിങ്ങളുടെ ആവശ്യങ്ങൾ നിങ്ങളുടെ പിതാവ് അറിയുന്നു. ആകയാൽ നിങ്ങൾ ഇപ്രകാരം പ്രാർത്ഥിക്കുവിൻ: സ്വർഗ്ഗസ്ഥനായ ഞങ്ങളുടെ പിതാവേ, അങ്ങയുടെ നാമം പൂജിതമാകണമേ; അങ്ങയുടെ രാജ്യം വരണമേ; അങ്ങയുടെ തിരുവിഷ്ടം സ്വർഗ്ഗത്തിലെപ്പോലെ ഭൂമിയിലുമാകണമേ. അന്നന്നുവേണ്ട ആഹാരം ഇന്നു ഞങ്ങൾക്കു തരണമേ. ഞങ്ങളുടെ കടക്കാരോടു ഞങ്ങൾ ക്ഷമിച്ചിരിക്കുന്നതുപോലെ ഞങ്ങളുടെ കടങ്ങൾ ഞങ്ങളോടും ക്ഷമിക്കണമേ. ഞങ്ങളെ പ്രലോഭനത്തിൽ ഉൾപ്പെടുത്തരുതേ; തിന്മയിൽനിന്നു ഞങ്ങളെ രക്ഷിക്കണമേ. എന്തെന്നാൽ, മനുഷ്യരുടെ തെറ്റുകൾ നിങ്ങൾ ക്ഷമിച്ചാൽ സ്വർഗ്ഗസ്ഥനായ നിങ്ങളുടെ പിതാവ് നിങ്ങളോടും ക്ഷമിക്കും.